نصائح 10 للتقديم للجامعة !

قبل ما أخش في موضوع نصائحي للناس اللي قرروا انهم يقدموا السنة دي
عايز احكي قصتي مع التقديم .. من تانية ثانوي كنت ماشي في السوق لقيت كتابين عجبوني اشتريتهم وسألت منهم أخوي قال ديل بتكلموا عن علم الادارة ومن الوقت داك قررت اخش ادارية .. قريبي في سنة تالتة قال لي الادارة دي بتطلب في مجال العمل انك تكون دارس مجال فني ما ، يعني معقولة اجيب لي زول قرا ادارة يدير لي مستشفى مثلا او مشروع ما !
شفت الكلام منطقي وقتها فقررت اخش هندسة نفط وبعدين اعمل ماستر في الادارة نسبتي ما بتدخلني نفط الخرطوم بتدخلني السودان فمشيت جامعة السودان وهناك زميلة قريبي اتكلمت معاي بكل صراحة وادتني كمية تبريرات اقنعتني انه ما اجي مجمعهم ونصائح اخواني كمان باني اخش جامعة الخرطوم بجانب نفسي اصلا كانت مايلة للخرطوم .. انسب حاجة والاقرب لنسبتي كانت هندسة كيميائية درسها نسيبنا فسألته عنها فوقّع لي كل شي عنها ومشينا زرنا الجامعة وشفنا الحاصل فيها ..
بجانب دا قريبي كوز اقترح لي اخش كرري ومشيت طلعت الشهادة السودانية لكن الفكرة ما عجبتني لأني ما بحب التعليمات وشخصيتي ما منضبطة بالشكل البشوفه عند الضباط .. وهكذا جات نتيجة التقديم وخشيت هندسة كيميائية ولحدي كتابة هذه السطور انا على وشك التخرج ولو رجع بي الزمن تاني كان قدمتها ما ندمت ابدا ابدا . طبعا الموضوع ما مشى بالسلاسة دي في مجموعة ظروف كانت محيطة بالموضوع من تانية ثانوي ولحدي كتابتي للرغبات في الاستمارة.

نخش في النصائح:
1-لو عندك مجال عايزه شديد وما بتفكر الا فيه من زمان دا لازم تخشه غصباً عن أهلك وأحرد ليهم أي شي لأنه عواقب تخش مجال غيره مؤلمة جدا جدا .
2-لو عندك هواية معينة فلازم تفرق بين الهواية والتخصص الدراسي الهواية دي حاجة بتمارسها وقت فراغك لما الموضوع يبقى واجبات ومحاضرات ربما لا يروق ليك فادرس الموضوع كويس.
3-تفكيرك مادي جدا وبتفتش عن المجالات البتجيب القروش ادرس وضعك وعاين للمستقبل والبلد وامشي لأي لعدد من الناس البتعرفهم ينصحوك تخش وين عشان تجيب قروش كمجال دراسي .
4-ما عندك أي حاجة في مزاجك وما حاسي انك مايل لمجال معين .. انت تحاول تقسم المجالات للفروع الرئيسية وتنتقل تاني للتخصص وتشوف الجامعة المناسبة مع نسبتك.. يعني المجال الطبي – المجال الهندسي –المجال الادبي – المجال الاقتصادي ..الخ اعتقد الفكرة وضحت
5-حاول بقدر الامكان “قائمة رغباتك” تختها بنفسك عشان دي حاجة بتتعلق بمستقبلك انت وبس انت الحتقرا وتتمعط بعدين.
6-انصحك تمشي لي ناس درسوا المجال الحسيت إنك ممكن تخشه .. وتسألهم عن كل الجوانب الدراسة والمستقبل والشغل عن أي شي في راسك.. ولو مشيت الجامعة والكلية عديل وشفت الوضع هناك عملي يكون احسن .
7-استخدم النت برضو للبحث عن المجالات المختلفة .. امكن تلقى حاجات تجذبك لمجال معين وحاجات تكتشفها هسي قبل ما الفاس يقع في الراس لا سمح الله.
8-النجاح والسعادة في الحياة ما مرتبطة بمجال معين طب قانون صيدلة هندسة علوم سياسية محاسبة .. شوف 20 زول ناجح وسعيد من حولك وشوفهم درسوا شنو حتلقاهم مجالات مختلفة وجامعات مختلفة .. الخلاصة النجاح والسعادة في الحياة حاجة مرتبطة بيك انت وبس.
9-مرات بتصدف تدخل مجال انت ما عاوزه من نفسك لكن تحبه بعد ما تدرسه احتمال الدكاترة او البيئة الجامعية الزملاء هم اللي حببوك فيه .. دي حاجة بتحصل بس ما كتييير > وبتحصل برضو تدرس مجال وتشتغل في مجال تاني عادي جدا خصوصاً في البلد دي وارجع تاني  للـ20 الشفتهم كم منهم اشتغلوا في مجال دراستهم ؟؟ .
10-كل النصائح الكتبتها دي ناجرها من راسي ومن تجارب ناس من حولي ما كلام علمي نهائي ولا مبني على دراسات مجرد خواطر ممكن تكون مفيدة للبعض .
سألنا زميل قال لينا بندرس الجامعة ليه ما دام ممكن عادي زول ما قرا طب يمارس الطب وحصلت كتييير وزول ما قرا هندسة يمارس الهندسة وبتحصل عادي .. وزول ما قرا محاسبة تلقاه شغال محاسب عادي .. زميلنا قال ليه شهادة الجامعة دي زي رخصة العربية بتحتاج ليها عشان تسوق عشان القانون وعشان النظام .. لكن ممكن تتعلم السواقة وتسوق بدون ما تحتاج رخصة !

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s